2 hinihinalang magnanakaw, arestado sa Sampaloc

Dalawang magkahiwalay na insidente ng pagnanakaw ang naitala sa Sampaloc, Maynila kung saan arestado ang dalawang suspek.

Inabutan sa G. Tuazon Street ang isang lalaki na itinuturong nangsnatch ng cellphone sa jeep.

Nagpanggap umanong pasahero ang suspek at nang makakuha ng pagkakataon, bigla na lang niyang hinablot ang cellphone ng isang babaeng pasahero.

Nakatakbo pa ang suspek pero nahabol din ng mga tao sa lugar kaya nabawi rin ang cellphone.

Isang 20 anyos na lalaki naman ang inaresto sa umano’y pagnanakaw ng bakal sa NLEX Project Construction site sa Algeciras Street.

Nagsumbong kasi ang mga residente nang makita sa likod ng riles na may buhat na bakal ang suspek.

Nagkakahalaga ng P10,000 ang mga materyales sa scaffolding na nakuha sa kanya.

Depensa naman ng suspek, ibinigay na ng contractor ang mga bakal na pinabulaanan naman ng security officer ng construction.

Parehong mahaharap sa kasong pagnanakaw ang dalawang inaresto.