Push Admin

‘Hindi ramdam ang Pasko’: Matumal na benta sa palengke, idinadaing ng mga tindero

Article (news)

ABS-CBN News

Umaaray ang ilang nagtitinda sa Mutya ng Pasig Mega Market nitong Huwebes ng umaga dahil hindi anila ramdam ang Kapaskuhan dahil mahina ang bentahan nila apat na araw bago ang Pasko. Sabi ni Cristy Agulto, tindera ng frozen products, sobrang tumal ang bumibili kahit hindi sila nagtaas ng presyo. Sa katunayan, bumaba pa ang presyo ng kanilang produkto. “Wala masyado ‘yung wholesale namin,” ani Agulto. “Mababa lang talaga ang benta namin ngayon.”“‘Yung dating bumibili ng mga pang-catering, kakaunti na lang hindi katulad ng mga nakaraang taon – madami sila. Ngayon kasi uso na ang food pack,” aniya. Ganito rin ang hinaing ni Girlie Tanawan na nagbebenta ng isda sa naturang palengke. Aniya, dapat ganitong petsa ay marami nang nag-oorder sa kanya. “Mahina ang benta,” sabi ni Tanawan na umaasa na lang sa kanyang mga suki para makabenta. “Mas ramdam namin ang bayarin kaysa Pasko,” dagdag niya. Para kay Jen Grutas, tindera ng karne, hindi pa niya ramdam na mapa-Pasko na. Magtataas daw sila ng presyo ngayong Biyernes dahil magtataas din ng presyo ang pinagkukuhanan nila ng suplay ng baboy. Aabot sa P20 ang pag-akyat ng presyo, sabi ni Grutas. “Parang mas lumala ngayon na sobrang tumal talaga, hindi katulad noon,” aniya. “Think positive na lang.” <div>SIMPLENG HANDAAN SA PASKO </div>Ang ilang mamimili naman na nakapanayam ng ABS-CBN News, sinabing pang-araw-araw na pagkain muna ang kanilang inaatupag. Isa na rito si Lyn Ferrer, na sinabing bumili muna ng baboy na isang kilo para sa kanyang pamilya. Mamimili raw siya ng para sa Pasko sa Biyernes o sa Sabado pa. “Kailangan, para mabigyan mo ng masarap na pagkain, kahit mahal, i-ano mo pa rin. Bilhin mo pa rin,” sabi ni Ferrer. Simpe lang din daw ang ihahanda nila sa Pasko. “Hindi pwede magarbo ngayon, sa hirap ng buhay hindi pwede magarbo,” dadgag niya. Naniniwala naman si Leonida Escaño, tagabenta ng gulay, na matumal ang bentahan ngayon dahil sa Bagong Taon pa maghahanda nang sobra ang mga tao. “Parang hindi namin ramdam ang Pasko kasi kaunti pa lang ang namimili. Actually dati kapag mga ganitong panahon, medyo dagsa na ang mga tao, baka kasi ubos na ang mga bonus ng mga tao,” sabi ni Escaño. Narito ang pinakahuling presyo ng bilihin sa Pasig Mega Market: GULAY • Carrots - P120/kilo • Talong - P100/kilo • Ampalaya - P100/kilo • Kamatis - P60/kilo • Broccoli - P200/ kilo • Pechay Baguio - P80/kilo • Bawang - P150/kilo • Sibuyas - P180/kilo (local) • Baguio Beans - P100/kilo • Sayote - P40/kilo • Patatas - P140/kilo • Repolyo from P80/kilo • Bell pepper - 140/kilo • Puting sibuyas mula China - P140/kiloISDA • Bangus - P240/kilo • Tilapia - P120/kilo • Galunggong - P120/kilo • Hipon - P480-520/kilo (kung malalak) • Hipon na medium sized - P340-P360/kilo • Hipon na maliliit - P300-P320/kilo MANOK • P160 whole - local • P150 - imported BABOY • Laman ng baboy - P300/kilo • Liempo - P360/kilo • Buto buto - P280/kilo • Ribs -P300/kilo • Kasim - P300/kilo • Baka - P420/kilo • Pata- P280/kilo ITLOG • 8.00 - Medium • 8.50 - Large

Umaaray ang ilang nagtitinda sa Mutya ng Pasig Mega Market nitong Huwebes ng umaga dahil hindi anila ramdam ang Kapaskuhan dahil mahina ang bentahan.