Performers unite for Joy Viado benefit show

Nagsilbing isang malaking reunion ng stand up comedians at performers ang Jam for Joy na isang benefit show para sa comedian na si Joy Viado na matagal ng naka confine sa Chinese General Hospital at nagpapagamot ng kanyang sugat sa binti na lumala dahil sa sakit na diabetes.

Isa isang nagdatingan sa The Library sa Malate ang mga performers gaya na sina K Brosas, Arnel Ignacio, John Lesaca, Ivy Violan, Inday Garutay at lumipad pa mula sa Amerika sina Bernardo Bernardo at Jo Awayan.

Sa ating interviews sa malalapit na kaibigan ni Joy, nagbigay trivia sila tungkol sa comedian na hindi nalalaman ng lahat. Tulad na lang ng sinabi ni Arnel Ignacio.

'Naku si Joy una ko nakilala yan singer talaga yan seryosong mang aawit at ang ganda ng boses. Yung pagka comedian nyan kabaligtaran naman ang personal niyang buhay naku kapag nag kuwento yan mala MMK ang buhay nyan lalo na ang love life niya.'

Si K Brosas naman nag share ng mga natutunan niya kay Joy Viado.

'Pareho kasi kami na kumakanta tapos nagpapatawa na rin, sa kanya ko una nakita yung bonggang pagiging professional at minamahal ang trabaho. Minsan lang tayo magkasama sama ng ganito at para sa kanya ito.'

Nag back track naman si Bernardo Bernardo sa kanyang stories at nag share ng beginnings ng career ni Joy sa live stage.

'Naalala ko noon mga totoy at nene pa yang sina Joy at Arnel lalapit sa akin yan isasama ko sa mga lakad ko at ayun bibigyan sila ng ilang moments sa stage para masanay sila. Nakakatuwa dahil eto nagkita kita kami ulit ngayon.'

Organized ni Mamu Andrew de Real ang event na ito na ang kikitain ay ibibigay kay Joy para makatulong sa kanyang pagpapagamot.

Sa May 30 isa pang benefit show para kay Joy ang binubuo na magaganap naman sa Zirkoh Comedy Bar.