ALAMIN: Mga pelikulang nanguna sa takilya sa MMFF 2019

Watch more in iWantv or TFC.tv

Halos P1 bilyon ang kinita sa takilya ng 2019 Metro Manila Film Festival (MMMF) sa loob ng 2 linggong pagpapalabas nito mula noong Pasko, ayon sa komiteng may hawak sa taunang timpalak.

Umabot sa P995 milyon ang total gross box office receipts ng 2019 MMFF, mas mababa ng 4.5 porsiyento sa P1 bilyon target at sa P1.6 bilyong kita noong nakaraang taon.

Ayon sa MMFF Executive Committee, ang mga sumusunod ang 4 na pelikulang nanguna sa takilya, na nasa alphabetical order:
• "Miracle in Cell No. 7"
• "Mission Unstapabol: The Don Identity"
• "The Mall, the Merrier"
• "3pol Trobol: Huli Ka Balbon!"

Hindi na rin inilabas ang gross receipts at ranking ng 8 pelikula, na kinabibilangan din ng "Mindanao," "Sunod," "Write About Love," at "Culion."

Ayon kay MMFF Executive Committee Chairperson Danilo Lim, isa sa mga nakaapekto sa kita ng MMFF ay ang pagsara ng maraming sinehan sa Visayas dahil sa bagyong Ursula at Mindanao dahil sa lindol.

Sa 2020, sisimulan umano ang kauna-unahang summer MMFF, na lalahukan din ng 8 pelikula.

Sa buong bansa pa rin ipalalabas ang mga mapipiling pelikula sa loob ng 11 araw.

Mag-uumpisa raw ito sa Black Saturday, at magkakaroon din ng Parade of Stars at awards night.

Sa Pebrero 15 nakatakda ang deadline ng submission ng finished films para sa summer MMFF.

-- Ulat ni MJ Felipe, ABS-CBN News