Nagpasalamat ang Pinoy drag queen na si Taylor Sheesh sa suporta ng Swifties, o ang mga tagahanga ng sikat na international artist na si Taylor Swift, sa suporta na ibinibigay ng mga ito sa kanya.

"Sobrang saya, kasi grateful ako lalo na sa Swifties. With them talaga kaya nagkaroon ng international recognition mga ganoon," ani Sheesh o Mac Coronel sa totoong buhay sa naging pagbisita nito sa "Magandang Buhay."

Taong 2009 nang magsimula na maging Swiftie si Sheesh dahil sa awitin ni Swift na "Fifteen." Nagsimula ang pag-impersonate nito sa idolo nang sumali siya sa isang lip-synch battle sa isang night club.

Bago sumikat bilang impersonator ni Swift, nagtrabaho sa isang call center si Sheesh na pangarap na maiangat sa buhay ng pamilya.  

Ayon kay Sheesh, hindi siya titiigil sa pagpapasaya ng mga tao hanggang hindi rin tumitigil ang idolo.

"Yes, walang susuko. Matira-matibay sa amin ni Taylor. Sino ang mas angat, sino ang mas sikat, charing!" biro ni Sheesh.