Trending: Asong madaming alam na tricks

TARLAC CITY -- Umani na ng mahigit two million views ang video ng Shi Tzu na si Goomie kung saan makikita ang aso na umiikot-ikot gamit lang ang dalawang paa habang sinasabi ng kanyang fur mom na si Bayan Patroller Catherine Ramos ang katagang 'alam na.'

Kwento ni Bayan Patroller Catherine Ramos ng Tarlac City, umiikot-ikot si Goomie kapag humihingi ng pagkain. 

Tinaguriang 'pandemic dog' ni patroller ang alagang si Goomie dahil nabili niya ito mula sa dating teacher walong araw bago itakda ang lockdown sa bansa noong March 2020 dahil sa pandemyang dulot ng COVID-19.  

Aniya, napilitan lang siyang bulhin si Goomie noon dahil ayaw niyang mag-alaga ng aso pero naging 'blessing in disguise' na nga si Goomie dahil ang aso ang tanging nakasama ni Bayan Patroller Catherine sa buong panahon ng lockdown.  

At dahil naka-lockdown, natutukan ni patroller ang paglaki ni Goomie at naturuan ng madaming tricks tulad ng pagdadasal bago kumain, pagsasara ng pituan at ng refrigerator, pag-ngiti, pag-ring ng bell kapag gusto ng treats, paghiga kapag sinabihan ng 'bang', at pag-roll. 

Malaki ang pasasalamat ni Bayan Patroller Catherine sa pagdating ni Goomie sa kanyang buhay dahil napasaya siya nito at naging 'best companion' sa mga pagsubok sa buhay lalo na noong naka-lockdown. 

Pinaghahandaan naman ni patroller ang pagsali sa mga pet fair sa mga susunod na buwan.