Ordinansa vs tsismis, lantarang pagsasabit ng underwear, labag sa batas?

Watch more in iWantv or TFC.tv

Sa bisa ng isang barangay ordinance, ipinagbabawal na ang lantarang pagsasamapay ng mga underwear sa Barangay Holy Ghost Proper sa Baguio City.

Pero legal nga ba ang pagbabawal sa isang may-ari ng bahay na isampay ang kaniyang mga underwear kung saan niya naisin?

Ayon kay Atty. Claire Castro sa "Usapang de Campanilla" ng DZMM, maaaring labag sa batas ang kakaibang ordinansa ng barangay.

"Ang question is ganito: kung sa bahay ko ako nagsampay, may bakod ako, kaya lang kita 'yung underwear ko... tapos pagbabawalan mo 'ko na magsampay sa sarili kong bahay? Parang na-violate naman ang aking right to property," ani Castro.

Sa ilalim ng Article 428 ng Civil Code of the Philippines, nakasaad na may "right to property" o may karapatan ang isang tao sa kaniyang sariling tahanan.

Ayon sa ordinansa, nahaharap sa multang P300 ang sino mang magsasabit ng kaniyang damit panloob sa labas ng bahay.

Sa Barangay Upper Rock Quarry naman sa Baguio, ipinagbawal sa ilalim ng isang ordinansa ang pagkakalat ng tsismis.

Pero ayon kay Castro, maaaring hindi na kailangan nito lalo na't may parusa naman batay sa Revised Penal Code ang oral defamation o ang paninira sa isang tao.