Lalaki, pinatay at sinunog ng sariling anak

SALVADOR BENEDICTO, Negros Occidental - Patay ang isang lalaki matapos pagtatagain at sunugin ng sariling anak sa loob ng kanilang bahay sa Barangay Igmaya-an sa bayang ito Lunes ng gabi.

Natutulog ang lalaki kasama ang kaniyang asawa nang pasukin ng kanilang 40 anyos na anak na lalaki ang kanilang bahay.

Pinagtataga ng anak ang kaniyang ama hanggang mamatay. Pagkatapos ay hinila nito ang bangkay palabas ng bahay at saka sinunog.

Sinubukang pigilin ng kaniyang ina ang suspek pero maging siya ay tinaga rin.

Nakatakas ang ina na ngayon ay nagpapagamot sa isang ospital sa Bacolod City.

Sa imbestigasyon ng pulisya, may problema umano sa pag-iisip ang nakatakas na suspek.

Lumalabas rin na iniwan ito ng kaniyang asawa nitong nakaraang linggo na maari umanong nakaapekto sa kaniyang pag-iisip ayon sa pulisya.

Nakatakda na rin sanang sumailalim sa medical check-up ang suspek bago pa naganap ang insidente.