Dalawang NPA, sumuko sa Palawan

PALAWAN - Dalawa pang miyembro ng New People's Army (NPA) ang sumuko sa Western Command (Wescom) matapos ang pagsuko rin ng pitong NPA noong Pebrero 17, 2017.

Ayon sa Wescom, kusang loob na sumuko ang mga ito sa pamahalaan. Kinilala ang mga itong sina alyas Ka Jerom at alyas Ka Jessan.

Ayon sa mga sumuko, pagod na raw sila. Tila nagkakaroon din daw ng diskriminasyon at korapsyon sa kanilang kilusan kaya nagpasya sila na sumuko na lamang para makapiling muli ang kanilang pamilya.

Tulad ng mga iba pang sumuko, isinailalim rin ang mga ito sa medical check-up at isasama bilang benepisyaryo ng local social integration program at comprehensive local integration program ng pamahalaan..

Samantala, masaya naman ang Wescom na kahit idineklara ng presidente ang all out war sa NPA ay walang kaguluhan sa Palawan, bagkus pa ay kusang sumusuko ang mga rebelde dito sa probinsya.

Umaasa naman ang militar na marami pang mga rebelde ang magbabalik loob.