Kumbento sa QC, nasunog; madre, fire volunteer nasugatan

Kumbento, nasunog sa Dama de Noche St., Bgy. Mariana, Quezon City pic.twitter.com/6Gtptq2cEm

— Ernie Manio (@ernie_manio) April 12, 2019

MAYNILA (UPDATED) - Nasunog ang isang kumbento sa Dama de Noche St., Barangay Mariana, Quezon City Sabado ng hatinggabi.

Nagtamo ng minor burn ang isang madre habang nasugatan ang isang fire volunteer, pero walang malubhang nasaktan sa insidente.

Ayon sa Bureau of Fire Protection (BFP), mabilis kumalat ang apoy dahil luma na umano ang gusali.

"Luma kasi ang main structure kaya kahit sa second nag-start gumapang pababa hanggang sa buong building ang sunog," ani Fire Chief Insp. Gilbert Valdez ng Quezon City Fire District.

Agad itong itinaas sa ikalawang alarma at nadamay rin ang 3 town house sa tabi ng kumbento. Electrical short circuit ang tinitingnang sanhi ng sunog.

"Walang tao sa kuwarto. Wala naman nagluluto. Walang naninigarilyo. Kuryente ito," dagdag ni Valdez.

Tinatayang nasa P70,000 ang halaga ng natupok na ari-arian. Hindi na nagpaunlak ng panayam ang mga madre.