3 enforcer na lumabag sa no backride policy, sinuspinde

MAYNILA - Tukoy na ng Metropolitan Manila Development Authority (MMDA) ang tatlong traffic enforcer na nakunan ng retrato ng netizen na magkahiwalay na may angkas sa motorsiklo o backride.

Ayon kay MMDA EDSA Traffic Chief Bong Nebrija, tinekitan at naka-preventive suspension na ang 3 traffic enforcer dahil sa paglabag sa panuntunan ng Inter-Agency Task Force (IATF) on COVID-19 response na nagbabawal sa backride o angkas sa motorsiklo.

"Sana maintindihan kami ng ibang frontliners na katulad nila na tumugon sa kanilang tungkuling, kami rin po ay tumutugon sa aming tungkulin at meron kaming mga polisiya at mandato na kailangang ipatupad. Pasensiya na po, pare-pareho po tayong tatamaan nito," sabi ni Nebrija.

Patuloy din aniya ang imbestigasyon sa 3 enforcer bilang bahagi ng due process para sa posibleng pagsasampa ng administrative case sa mga ito.

Dagdag pa ni Nebrija, no exemption sa pagbabawal ng backride ngayong panahon ng enhanced community quarantine.