Pagbibigay ng limos sa mga garbage collector sa Quezon City, bawal ayon sa LGU

MAYNILA - Nagpaalala ang Quezon City sa mga residente nitong Miyerkoles na huwag magbigay ng anumang uri ng limos sa mga garbage collector.

Mahigpit kasi umano itong ipinagbabawal, ayon sa Quezon City Task Force on Solid Waste Management.

Ipinalabas ang anunsyo matapos ipag-utos ni Quezon City Mayor Joy Belmonte ang imbestigasyon sa mga report na ilang waste collection crew ang nagso-solicit kasabay ng pangongolekta ng basura.

Sa reaksyon sa ilang post sa social media, ilang residente ang nagsabi na may ilang garbage collector ang hindi kinukuha ang basura kung hindi bibigyan ng pera, ngunit marami ang nagsabi na kusang loob silang nagbibigay sa mga kolektor.

Maglalabas din ng memo ang Quezon City upang agad i-monitor at agad mai-report ang mga makikitang pagkukulang sa solid waste management at sanitation.