77 pasahero stranded sa Legazpi Port

MAYNILA – Umabot sa 77 pasahero ang stranded ngayon sa Legazpi Port sa Albay dahil sa masamang panahon.

Hindi pinahintulutan ng Philippine Coast Guard na maglayag ang dalawang sasakyang pandagat sa Albay dahil sa lubhang peligro dala ng malalakas na alon.

Isang vessel at dalawang bangkang de motor naman sa Rapu-Rapu Port sa Albay rin ang hindi pinayagang maglayag subalit wala namang stranded na pasahero.

Kahit walang Tropical Cyclone Warning Signal sa isang lugar, may awtoridad ang pinuno ng Coast Guard Station na magkansela ng biyahe lalo kung malalakas ang alon sa panggagalingang pantalan at maging sa pupuntahan.

Nauna nang naglabas ng babala ang PAGASA na huwag munang maglalayag sa eastern seaboard ng Luzon at Visayas at sa western seaboard ng gitna at timog Luzon.

Ito'y dahil sa umiiral na habagat na pinalakas pa ng bagyong "Domeng" na nasa silangang bahagi ng Batanes at inaasahang lalabas ng Philippine area of responsibility sa Linggo.