Nagbalik-loob sa gubyerno ang 19 na miyembro ng New People’s Army sa Masbate.

Martes ng hapon nang iniharap sa media ng 903rd Brigade ng Philippine Army sa Sorsogon ang 19 rebel returnees na miyembro ng komiteng probinsiya ng Masbate.

Isinagawa ang seremonya sa 2nd Infantry Battalion ng Philippine Army sa Milagros, Masbate.

Pito sa mga rebel returness ay mga babae at nasa 15-anyos naman ang pinakabatang miyembro ng grupo.

Ayon kay 903rd Brigade General Fernando Trinidad, ang pagsuko ng mga ito ay resulta umano ng patuloy nilang pakikipag-usap sa mga kamag-anak ng mga rebelde para kumbinsihin silang sumuko.

Katulong din daw ng Philippine Army sa ganitong hakbang ang iba pang stakeholders.

Sa ngayon, nasa kustodiya ng Army ang 19 rebel returnees at makakatanggap ng P100,000 halaga mula sa pamahalaan.

Siniguro din nila ang kaligtasan ng mga ito.

Anim na M16, 1 M2 Carbine, 2 shotgun at iba pang armas ang isinuko nila sa Army.