P70-K ilegal na kahoy nasabat sa Mindoro; ex-konsehal itinurong may-ari

Mga ilegal na coco lumber mula sa Pola, Or. Mindoro, nasabat sa Calapan City Pier | via @NoelAlamarDZMM pic.twitter.com/XyOe74cuKJ

— DZMM TeleRadyo (@DZMMTeleRadyo) July 12, 2017

MANILA - Nasabat ng mga awtoridad ang isang truck ng ilegal na coco lumber na ipupuslit sana palabas ng Oriental Mindoro, Huwebes.

Palabas na sana ng Calapan City Port ang truck na minamaneho ni Mario Batinga nang maharang ito ng pulisya, Philippine Coast Guard at Bureau of Plant Industry, ayon kay Mimaropa police spokesperson Supt. Imelda Tolentino.

Nasa 8,000 board feet aniya ang sukat ng kahoy na nagkakahalaga ng P70,000.

Expired na ang permit to transport na ipinakita ng driver kaya kinumpiska ng awtoridad ang nasabing kargamento, dagdag ni Tolentino.

Napag-alaman din aniyang galing sa bayan ng Pola ang kargamento at dadalhin sana sa Metro Manila.

Sa panayam ng Radyo Patrol, sinabi ni Calapan police chief Supt. Jojo Paguio na si dating Konsehal Archilito Dumaran ng Pola ang may-ari ng kontrabando, base sa ipinakitang dokumento ng driver.

Nito lamang nakaraang linggo, nasabat din aniya sa Socorro ang kahalintulad na kontrabando na pagmamay-ari rin umano ni Dumaran.

Inihahanda na ng pulisya ang mga kasong isasampa nila sa mga suspek. -- Ulat ni Noel Alamar