Kainan sa Benguet, huli sa pagbebenta ng karne ng aso

Arestado ang may-ari ng isang kainan sa pagbebenta ng karne ng aso sa La Trinidad, Benguet.

Ilang buwan nang minamanmanan ng Criminal Investigation and Detection Group (CIDG) ang diumano'y bentahan ng karne ng aso sa nasabing lugar.

Sa kuha ng CCTV nakitang may itinapon na nakabalot sa pink na tuwalya. Nang damputin ito ng mga operatiba, tumambad sa kanila ang mainit-init pang lutong ulo ng aso.

Nakumpiska sa kainan ang dalawang ulo ng aso at ang iba pang mga bahagi nito.

Hindi umano bababa sa 2 aso ang kinakatay dito kada araw at nagmumula pa umano ang mga ito sa iba't ibang bahagi ng Luzon.

Nahaharap ang may-ari ng kainan na si Alexander Galut sa reklamong paglabag sa Animal Welfare Act of 1998 at sa Anti-Rabies Act of 2007.

Katuwang ng CIDG ang sa operasyon ang non-government organization na Animal Kingdom Foundation.

-Umagang Kay Ganda, ika-27 ng Hulyo 2017