Watch more in iWantv or TFC.tv

Hindi muna naglabas ng desisyon ang Makati Regional Trial Court (RTC) Branch 148 sa mosyon ng Department of Justice (DOJ) na ipaaresto si Senador Antonio Trillanes IV kaugnay sa kaniyang 2003 coup d’etat case na nais muling buhayin matapos ipawalangbisa ang kaniyang amnestiya.

Makati RTC Branch 148, hindi nagpalabas ng warrant of arrest laban kay Sen. Trillanes. #TrillanesAmnesty | Ulat ni @RPfredcipres pic.twitter.com/qMty8aI02h

— DZMM TeleRadyo (@DZMMTeleRadyo) September 13, 2018

Nitong Huwebes itinakda ang pagdinig sa mosyon para sa hiling na alias warrant of arrest at hold departure order (HDO) laban kay Trillanes. Pero ayon sa korte, umaga lang nila natanggap ang sagot ng prosekusyon.

Dahil dito, binigyan pa nila ng 10 araw ang kampo ni Trillanes upang magbigay ng supplemental reply sa ipinasang komento ng DOJ.

Mayroon ding limang araw ang DOJ para magbigay ng rejoinder reply sa magiging komento ni Trillanes.

Dahil dito, 15 araw pa ang bibilangin para umusad ang mosyon ng DOJ.

Samantala, may nakabinbin pang mosyon ang DOJ sa Makati RTC Branch 150 na humahawak naman noon sa kasong rebelyon ni Trillanes. Nais din ng DOJ na maglabas ito ng alias arrest warrant at HDO laban kay Trillanes.

Martes nang maglabas ng resolusyon ang Supreme Court na hindi nila aaksiyonan ang hiling na temporary restraining order (TRO) laban sa Proclamation 572 na nagpapawalangbisa sa amnestiya ni Trillanes.

• SC pinaubaya sa Makati RTC ang pagdedesisyon sa Trillanes amnesty

Isinapubliko ang Proclamation 572 ni Pangulong Rodrigo Duterte noong Septyembre 4. Ayon dito, walang bisa sa simula pa lamang ang amnestiya ni Trillanes dahil hindi nasunod ang mga tamang proseso sa pag-abruba nito.

• Palasyo pinawalangbisa ang amnesty ni Trillanes; senador tinawag na 'duwag' si Duterte