3 lalaking 'nanlaban' sa pulis, patay sa Cagayan de Oro

CAGAYAN DE ORO CITY - Patay ang tatlong lalaki matapos umanong manlaban sa mga pulis na maghahain sana ng warrant of arrest sa isang residente sa isang subdivision sa Barangay Lumbia, Cagayan de Oro City Huwebes ng gabi.

Target ng warrant of arrest ang isang Marvin Fajardo na may kasong direct assault.

Taong 2013 pa nang ilabas ng Fourth Judicial Region Municipal Circuit Trial Court ng Tanauan City, Batangas ang nasabing warrant.

Isinagawa ang operasyon nang malaman ng pulisya na ilang buwan nang nakatira sa lungsod si Fajardo.

Ngunit nang ihain na ang warrant, nagpaputok ng baril si Fajardo at dalawa pang kasamahang lalaki.

Gumanti ang mga pulis at nagtamo ng tama ng bala ang mga suspek.

Isinugod sila sa ospital pero binawian rin ng buhay.

Ayon sa awtoridad, si Fajardo umano ang leader ng "Fajardo Criminal Group" na sangkot sa iba't ibang ilegal na gawain sa Batangas City, Laguna at National Capital Region.

Kabilang rin umano si Fajardo sa listahan ng mga high-value target ng Police Regional Office 4A at sa listahan ni Pangulong Rodrigo Duterte.

Patuloy pang inaalam ng pulisya ang pagkakakilanlan ng dalawang kasama ni Fajardo.