Lalaking iniwan umano ng asawa timbog sa indiscriminate firing

Watch more in iWantv or TFC.tv

Arestado sa Bacoor City, Cavite ang isang lalaki na walang habas na namaril matapos umanong iwanan ng kaniyang asawa.

Hinuli ng Bacoor police noong hapon ng Sabado ang suspek na si Alison Sarip, 33, matapos i-report na sunod-sunod itong nagpaputok ng baril sa Barangay Zapote I.

Sinubukang barilin ni Sarip ang isang Roberto de Leon habang ito ay nagsasampay pero hindi ito tinamaan, ayon kay Lt. Col. Vicente Cabatingan, hepe ng Bacoor police.

Isang aso naman ang tinamaan ng bala ni Sarip, dagdag ni Cabatingan.

Ayon kay Sarip, magulo lang ang kaniyang isip dahil isang buwan na buhat nang iwanan siya ng kaniyang misis, na pinagbibintangan siyang nambabae.

Lumabas sa imbestigasyon ng Bacoor police na 2 buwan pa lang mula nang nakalaya ang suspek dahil sa kasong may kinalaman sa ilegal na droga.

Mula nang makalaya, 3 beses nang inireklamo ang suspek ng walang habas na pagpapaputok ng baril, ayon kay Cabatingan.

May nabaril nang tao si Sarip pero nagkaaregluhan lang, ani Cabatingan.

Kinasuhan ng attempted murder, alarm and scandal, indiscriminate firing, illegal possession of firearm, at animal cruelty ang suspek.

-- Ulat ni Dennis Datu, ABS-CBN News