Sunog sumiklab sa business center ng San Jose, Occ. Mindoro

Watch more News on iWantTFC

MAYNILA — Sumiklab ang malaking sunog sa business center ng San Jose, Occidental Mindoro ngayong Lunes ng hapon.

Sa panayam ng ABS-CBN News kay SFO1 Norly Santos, arson investigator ng San Jose Fire Station, mag-aalas dos ng hapon nang magsimula ang sunog.

Nadamay ang isang appliance center, milk tea shop, tindahan ng mga motorsiklo, tindahan ng mga damit, at iba pang establisimyento.

Nangyari ang sunog sa Rizal St., Bgy. Poblacion 1 kung saan halos isang block ng mga tindahan ang natupok.

Inaalam pa kung saan nagsimula ang apoy.

Umabot sa ikaapat na alarma ang sunog kaya bukod sa mga bumbero ng San Jose Fire Station, MDRRMO at mga Fire volunteer brigade ay rumesponde na rin ang mga bumbero mula sa iba-ibang bayan.

Nahirapang apulahin ang apoy dahil sa lakas ng hangin.

Alas-4:30 ng hapon nang ideklara itong fire out.

Wala namang nasaktan sa sunog at inaalam pa ang halaga ng pinsala.