Puma lumangoy sa ilog sa Chile

Nagulat ang ilang residente sa Chile matapos makitang lumalangoy sa ilog ang isang puma noong Lunes (Pebrero 12).

Naglalakbay ang mga saksi sa isa sa mga ilog sa southern Chile nang makakita sila ng tila may nalulunod na hayop. Nagulat sila nang makitang isang puma pala ang lumalangoy sa ilog na may lapad na humigit-kumulang 200 metro.

Kinumpirma ni Alberto Duarte, veterinary doctor at animal welfare manager sa Buin Zoo sa Chile na ang hayop na nakitang lumalangoy ay isang puma, isang hayop na katutubo sa Americas.

Aniya, ang mahabang paglangoy nito ay normal ngunit hindi pangkaraniwang pag-uugali para sa mga puma. Ayon kay Duarte, lumalangoy ang mga puma para makatakas sa mga kaaway nito o kaya'y para mas mabilis makarating sa pupuntahan.