MAYNILA — Bugbog-sarado ang isang lalaki matapos mangholdap umano ng taxi driver sa Barangay 13 sa Pasay City nitong Miyerkoles ng madaling araw.

Kwento ng taxi driver, sinakay niya ang lalaki sa Pasay Rotonda at nagpahatid sa Leveriza. 

Kinutuban na siya dahil ang lalaki mismo ang nagdidikta kung saan sila dadaan. At nang makarating sa may Williams Street, tinutukan siya nito ng kutsilyo. 

“Akin na ‘yung cellphone ika niya. Sabi ko hawak mo ko e, paano ko maabot? (Sabi niya) sige na bilisan. Tinutukan niya, tutuluyan kita ika niya,” kwento ng taxi driver. 

Sakto namang may dumaan na mag-asawa na nakaagaw sa kanila ng pansin. Palusot ng lalaki, kinokontrata umano siya ng taxi driver.

“Binuksan ko ‘yung pinto nung malapit na. Tapos sabi niya, hindi parehas ‘tong taxi driver e, kinokontrata ako pero naka-metro naman,” sabi ng taxi driver. 

“Tapos hinihingi na niya ‘yung pera. Sabi ko wala pa kong pera. Tapos tumakbo na siya,” dagdag ng taxi driver. 

Naglakas loob siya na habulin ang lalaki at humingi ng tulong sa mga nakatambay na residente na kumuyog sa suspek.

“Habang dina-drive ko, nakabukas ‘yung pinto. Nagsisigaw na ko ng tulong, holdaper kako. Narinig nila tapos hinabol nila. Banda roon na-corner na siya ng mga netizen, binugbog na siya,” sabi ng taxi driver.

 Ayon sa rumespondeng tanod, nagpakilala pa bilang pulis ang suspek pero wala naman siyang maipakitang I.D. 

Narekober sa loob ng taxi ang isang kitchen knife at ang tinangkang kunin na cellphone at pera na P1,500.

Sa imbestigasyon ng pulisya, napag-alaman na nakainom noon ang suspek.

“Sabi niya is galing siya sa isang inuman and then, parang hindi raw sila nagkasundo sa presyo ng babayaran niya sa taxi,” sabi ni Lt. Ramil Antonio, Deputy Station Commander ng Pasay CPS Sub-Station 1. 

“Patuloy naming inaalam ‘yung tunay na background nitong suspek at kung meron ba ‘tong mga criminal records,” dagdag ni PLt. Antonio:

Posibleng maharap sa reklamong robbery-holdup ang suspek.