Daven Tamayo

Ride sa Pasay amusement park, nag-malfunction; mga pasahero naiwang nakabitin sa ere

Article (news)

Zyann Ambrosio

ABS-CBN News

Mahigit isang oras na nakabitin sa ere ang ilang pasahero matapos magkaaberya ang isang ride sa isang amusement park sa Pasay City noong Miyerkules ng hapon, bisperas ng Pasko.Isa sa mga na-stranded ay si Josua Alvarez, na nagbahagi ng kanyang karanasan sa ABS-CBN News. Ayon sa kanya, bandang alas-3:20 ng hapon nang biglang huminto ang ride matapos makarinig ng kakaibang tunog.“Around 3.20 to 3.25 po ng hapon, nag-start po yung ride. May narinig po akong parang hindi inaasahang sound, tapos doon na po biglang nag-stop,” ani Alvarez.Sinabi ni Alvarez na agad namang sinubukang ayusin ng mga staff ang ride, ngunit lumipas ang mahigit isang oras na walang nasisimulang rescue operation.“Nag-antay po kami ng higit isang oras. Wala pong na-rescue within that time kasi parang hindi rin po nila maayos yung machine,” dagdag niya.Habang patuloy na nakabitin sa ere ang mga pasahero—kabilang ang ilang bata—lalo umanong tumindi ang takot at pangamba. Dahil dito, nagpasya si Alvarez na siya na mismo ang tumawag sa emergency hotline.“Nung nakita ko pong matagal na at wala pang rescue, ako na po yung tumawag sa 911 para makapag-dispatch ng BFP,” ayon sa kanya.Dumating ang Bureau of Fire Protection (BFP) Pasay bandang alas-4:40 ng hapon upang tumulong sa rescue operations. Ayon kay Alvarez, isa siya sa mga unang naibaba makalipas ang halos isang oras at labinlimang minuto, habang ang iba ay nanatiling nakabitin nang mahigit dalawang oras.“Maswerte po ako kasi ako po yung isa sa mga unang na-rescue. Yung iba po, more than two hours pa bago sila naibaba,” ani Alvarez.Inilarawan niya ang karanasan bilang labis na nakakatakot at &quot;nakaka-trauma.&quot; “Nakakatakot po talaga kasi ang taas, tapos very unexpected po na ma-stuck kami sa ere. Ang wish ko na lang po noon ay makababa,” aniya.“Talagang nakakapagod, nakakastress at nakaka-trauma po yung nangyari.”Ayon kay Alvarez, may ilang pasahero ang nakaranas ng hilo, habang ang iba—lalo na ang mga bata—ay umiiyak dahil sa takot.“Kita mo po sa mga bata sa mata nila yung sobrang hirap na pinagdaanan nila. May mga umiiyak at sumisigaw na po talaga,” dagdag niya.Ikinuwento rin ni Alvarez na ginamitan ng hagdan at platform ang rescue, kung saan isa-isang inililipat ang mga pasahero pababa.“Binuksan po nila yung safety gear, tapos dahan-dahan po kaming binaba sa platform. Isang maling hakbang lang po, puwedeng mahulog,” aniya.Napansin din umano niya ang kakulangan sa malinaw na komunikasyon mula sa management habang isinasagawa ang rescue.“Wala pong malinaw na communication habang nakabitin kami. Kahit may megaphone po sila, walang nag-e-explain kung ano na yung nangyayari,” ani Alvarez.Bagama’t hindi na umano siya maghahain ng reklamo, nanawagan si Alvarez sa publiko at sa pamunuan ng amusement park.“Kung may mas ligtas na paraan para ma-enjoy ang holidays, baka po mas mabuti yun. Para naman po sa management, sana mas paigtingin pa ang safety checks at gawing malinaw ang rescue protocols.”Hinihintay pa rin ng ABS-CBN News ang tugon ng namamahala ng amusement park at sa mga awtoridad kaugnay ng insidente.

Mahigit isang oras na nakabitin sa ere ang ilang pasahero matapos magkaaberya ang isang ride sa isang amusement park sa Pasay City noong Miyerkules ng hapon, bisperas ng Pasko.

Mahigit isang oras na nakabitin sa ere ang ilang pasahero matapos magkaaberya ang isang ride sa isang amusement park sa Pasay City noong Miyerkules ng hapon, bisperas ng Pasko.