Singaw at menstruation: May koneksyon?

Mahapdi, mahirap kumain at mahirap lumunok. Naranasan mo na ba magkaroon ng singaw?

Sa programang “Aksyon Ngayon” sa DZMM, tinalakay ni Dr. Denis Ngo ang sanhi at lunas para sa sakit na singaw.

Ayon kay Ngo, ang singaw o stomatitis ay sugat o pamamaga sa lining ng bibig.

“Hindi ito nakakahawa. Ang gitna nita ay puti o dilaw at ang paligid ay mapula. Para siyang crater. ‘Yun ang appearance ng singaw,” aniya.

Trauma sa pagsisipilyo o kaya’y aksidenteng pagkagat ang ilan sa mga sanhi ng singaw. Maaari itong galing sa bacterial, fungal o viral infection.

Mabilis gumaling ang singaw, mga 1-2 araw, dahil ang oral mucosa ay mabilis maghilom. Ang ibang singaw na hindi kaagad gumagaling ay maaaring may koneksyon sa food allergy, kakulangan sa nutrisyon o ibang sakit.

Ayon kay Ngo, may ilang babae na nagkakaroon ng singaw kapag may menstruation. 

“May mga kababaihan nga, dahil sa kanilang kabuwanan o menstrual period every month, meron occurrence ‘yan. Hindi lahat ha. Ang iba, dysmenorrhea. Ang iba malakas ang buhos sa 1-2 days. Ang iba, singaw,” aniya.

Malaki minsan ang singaw ng mga diabetiko dahil sa impeksyon at mabagal na paghilom.

Hindi rin niya inirerekomenda ang paglagay ng asin, suka o tawas sa singaw para gumaling ito.

Alamin ang iba pang impormasyon tungkol sa singaw sa talakayang ito.