Geline Salac

Sapul sa CCTV: Babaeng nagpapanggap na magulang nagnanakaw sa mga paaralan

Article (news)

Eon Sanchez

ABS-CBN News

MAYNILA — Arestado ang isang 48-anyos na babaeng suspek sa serye ng pagnanakaw sa mga paaralan sa Maynila matapos siyang matunton ng mga awtoridad sa pamamagitan ng warrant of arrest.Inaresto ang suspek noong gabi ng Agosto 21 sa A. Zamora Street, Barangay 782, Sta. Ana, Maynila ng mga tauhan ng Special Mayor’s Reaction Team (S.Ma.R.T) ng Manila Police District. Isinagawa ang pag-aresto batay sa warrant na inilabas ng Metropolitan Trial Court Branch 31 sa Quezon City para sa kasong theft, na may inirekomendang piyansa na ₱10,000.Batay sa imbestigasyon at CCTV footage, suspek ang babae sa pagnanakaw sa nasa apat na pampublikong paaralan sa Maynila, kabilang ang Mabini Elementary School sa Quiapo, Silahis ng Katarungan Elementary School sa Paco, pati na ang Zamora Elementary School at Bagong Barangay Elementary School sa Pandacan.Paliwanag ni Police Major Tom Jay Fallar, chief administrator ng S.Ma.R.T, nagpapanggap ang suspek bilang magulang o guardian upang makapasok sa mga silid-aralan at makalapit sa mga guro.“Nakatanggap po ng message ang aming hepe ng isang tip na mula sa ating city security force na may isang nag-viral na babae na nagpapanggap na magulang para makapasok sa mga eskwelahan... Sa kanyang pagpasok, kapag nakatiyempo siya ay ninanakawan niya yung mga teacher. Kung anong makita niyang mahalagang bagay, nakukuha niya sa eskwelahan,” ani Fallar.Sinasamantala umano ng suspek na bukas ang campus tuwing abala ang marami, lalo na kung may biglaang kanselasyon ng klase at sunduan.“Kasi yung mga magulang, pwedeng pumasok sa eskwelahan para sunduin yung anak. So siya, nagpapanggap na magulang hanggang sa makapasok siya sa mga classroom,” paliwanag pa ni Fallar.Sa pinakahuling insidente sa Pandacan, pera at cellphone ng isang guro ang tinangay nito.Bukod sa mga paaralan, pinapasok din umano ng suspek ang mga simbahan at bahay-sambahan habang nagpapanggap na miyembro.“Kumukuha siya ng pagkakataon na kapag yung isang tao ay nagdadasal, doon niya ginagawa yung pagnanakaw niya,” ayon pa kay Fallar.Natunton ang suspek matapos ang backtracking sa CCTV footage kung saan nakita ang kaniyang mukha sa isang convenience store bago natukoy ang kaniyang tirahan.Lumabas din sa police records na may apat na naunang kaso ng pagnanakaw ang suspek gamit ang kaparehong modus sa Mandaluyong noong 2017, Sta. Maria, Bulacan noong 2021, at Novaliches noong 2022.Patuloy na iniimbestigahan ng pulisya kung may mga kasabwat ang suspek, habang pinag-iingat at pinahihigpitan naman ang seguridad sa mga paaralan.Hinikayat din ng S.Ma.R.T ang iba pang posibleng biktima na lumapit sa kanilang tanggapan upang mapalakas ang kaso laban sa nakakulong na suspek.

Arestado ang isang 48-anyos na babaeng suspek sa serye ng pagnanakaw sa mga paaralan sa Maynila matapos siyang matunton ng mga awtoridad sa pamamagitan ng warrant of arrest.

Arestado ang isang 48-anyos na babaeng suspek sa serye ng pagnanakaw sa mga paaralan sa Maynila matapos siyang matunton ng mga awtoridad sa pamamagitan ng warrant of arrest.