Virgilio Lorenzo Jr

Lalaki sa Ilocos Sur, huli sa video habang sinasaktan ang biyenan na PWD

Article (news)

Jessie Cruzat

ABS-CBN News

Sapul sa video ang pananakit ng isang lalaki sa 57-anyos na biyenan na isang person with disability.Nangyari ang insidente sa Barangay Las-Ud sa Tagudin, Ilocos Sur noong ika-3 ng Marso.Sa apat na segundong cellphone video na ipinadala sa ABS-CBN News, kita kung paanong hinataw ng t-shirt ng lalaki ang kanyang biyenan.Sa isa pang video, nagbitbit pa ng isang maliit na tangke ng LPG ang lalaki at ambang ihahampas sa nagmamakaawang ginang.Kwento ng isa sa mga anak ng biktima na si Desiree Villanueva, umuwi ang kanyang bayaw na lasing galing sa trabaho matapos sunduin ng asawa niya.“Bago po mangyari ‘yong pananakit, mayroon na po silang away ng ate ko. So, nagwala-wala po siya doon sa bahay namin kasi may away na po sila ng ate ko na napapabayaan na daw po kasi ng ate ko ‘yong bayaw ko kasi naitutuon na daw po ng ate ko lahat ng oras niya sa mother ko, sa mother namin,” ani Villanueva.Dito na umano binalingan ng lalaki ang biktima na kaka-opera lang sa utak noong nakaraang taon.“Humihingi po kami ng tulong lalo na sa mga kapulisan para po mabigyan ng hustisya sa nangyari kay mama kasi hindi po makatarungan ‘yong ginawa niya at kahit sinong tao po, walang right gawin ‘yon lalo na sa mga taong walang kalaban-laban,” dagdag ni Villanueva.Mariing kinondena ng Department of Social Welfare and Development ang naturang insidente.Ayon sa kay Assistant Secretary Irene Dumlao, tagapagsalita ng DSWD, walang puwang sa lipunan ang pananakit at pang-aabuso sa kababaihan lalo na’t ngayong araw ipinagdiriwang ang International Women’s Day.“‘Yong ating mga nanay, ’yong ating mga tiyahin, mga ate, nararapat lang na igalang at protektahan sila. Again, walang sinuman po ang dapat manakit sa mga kababaihan lalo-lalo na sa may mga kapansanan,” ani Dumlao.Dagdag ni Dumlao, handa ang kagawarang ibigay ang lahat ng maaari nitong itulong sa sinaktang ginang.“Kung ipu-pursue po ’yong legal case against the perpetrator o ’yong nanakit po doon sa nanay ay maaari natin silang tulungan, si nanay at ’yong kaniyang mga anak. Puwede natin silang mai-refer sa Public Attorney’s Office para makapagsampa tayo ng kaso laban nga doon sa perpetrator.”Nai-report na rin ng pamilya ng biktima ang insidente sa pulisya na handang magsampa ng kaso laban sa lalaki.

Sapul sa video ang pananakit ng isang lalaki sa 57-anyos na biyenan na isang person with disability.

Sapul sa video ang pananakit ng isang lalaki sa 57-anyos na biyenan na isang person with disability.