MAYNILA — Papalitan ng Department of Transportation (DoTr) ang matarik at nakalululang footbridge na tinaguriang “Mt. Kamuning” sa EDSA ng mas mababa at accessible na disenyo para sa mga commuter.

Batay sa inisyal na plano ng DOTr, lalagyan na rin ito ng elevator na mapapakinabangan ng mga senior citizen, persons with disability o PWD, at mga buntis. 

Dagdag pa ng ahensya, gigibain lamang ang kasalukuyang istruktura kapag natapos na ang konstruksyon ng bagong disenyo.

Kasunod ito ng utos ni Pangulong Ferdinand Marcos Jr. na alisin na ang lakaran.

Binatikos at ginawa pang katatawanan ng ilan ang NIA South Road-Scout Borromeo St. footbridge na itinayo noong 2018 ng Metropolitan Manila Development Authority para maiwasan ang jaywalking at aksidente sa lugar. 

Depensa nila, kinailangang taasan ang tulay na binansagan pang “Stairway to Heaven” para hindi tumama sa power lines ng MRT-3. 

 – Ulat ni Harlene Delgado, Patrol ng Pilipino

Video produced with Claire Tolentino

'Paspasan talaga': DOTr eyes replacement to 'Mt. Kamuning' footbridge within 6 months

President Marcos Jr. orders demolition, replacement of Kamuning Footbridge

Too high? MMDA defends Kamuning footbridge