Wala pang limang taon pero aabot na sa 12 ang branches ng Japanese restaurant ng mag-asawang Monique at Javerne Pasahol sa Metro Manila at sa mga kalapit na probinsya.

Hindi sukat akalain ng mag-asawa na magagawa nilang palaguin ang negosyong nabuo noong pandemya.

Nagsimula umano ang ideya sa negosyo sa palengke ng pamilya ni Monique kung saan gusto na itong ihinto ng kaniyang ama.

"Sayang naman 'yung negosyo, since doon ako napagpaaral. Okay naman 'yung buhay namin. So sabi ko, sayang naman, since na-start na natin 'yung business na 'yan and maraming nangangarap magkaroon ng negosyo,” kuwento ni Monique para sa programang “My Puhunan: Kaya Mo!”.

Nilevel-up ni Monique ang negosyo sa palengke ng kanilang pamilya.

Gamit ang P3,000 puhunan nagsimulang magbenta ng take-out na sashimi ang mag-asawa sa maliit na puwestong itinayo nila sa Quezon City noong 2021.

"Kailangan mo dumayo ng Japanese restaurant 'pag nag-crave ka. So, nu'ng time na 'yun halos kami pa lang 'yung nagdedeliver ng sashimi lang. Kung nagcrave ka, gusto mo ng sashimi. Meron na 'yun na soy sauce, and 'yung wasabi. So, complete package na siya," pagdedetalye ni Monique.

Pumatok ang kanilang kabuhayan sa madla kung kaya't sinugalan na nila na magtayo ng resto.

"Unti-unti siya. Hindi siya 'yung biglang binuksan mo," ani Javerne.

Habang tumataas ang demand, unti-unti ring nadagdagan ang mga produktong iniaalok nila.

Mula sa simpleng sashimi trays, isinama na rin nila ang maki rolls na agad ding tinangkilik ng kanilang mga suki.

Nitong Mayo 2025, binuksan lamang nila ang ika-12 branch nila sa Antipolo.

Para sa mag-asawa, hindi lang ang negosyo ng kanilang ama ang naging puhunan nila kundi ang lakas ng loob at tiwala nila sa isa’t isa.

"Kung alam naman natin na maayos, maganda naman ‘yung kinakalabasan, go lang kami." ani Monique.

"Sila (empleyado) 'yung kasama namin sa simula, kasi sila 'yung kakampi namin. Kung wala siła, walą rin kami dito." dagdag ni Javerne.

Tuklasin kung paano naging patok na negosyo ang simpleng ideya sa likod ng sariwang sashimi trays dito lang sa ‘My Puhunan: Kaya Mo!’ kasama si Migs Bustos.