TAGUM CITY, Davao del Norte -- Patay ang retiradong Provincial Agrarian Reform officer ng Davao del Norte na si Nicasio Lemente, matapos itong pagbabarilin ng hindi pa nakikilalang armadong "riding-in-tandem" Linggo ng umaga.

Patay ang 68-anyos na dating opisyal ng Department of Agrarian Reform sa Davao del Norte pasado alas-otso ng umaga sa Osmena Street, Tagum City.

Bibili lang sana ng gamot sa botika ang biktima kasama ang kanyang asawa at kaibigan nang biglang may armadong nakamotor ang huminto sa lugar at binaril ang biktima.

Ilang metro lang ang layo sa police station ng pinangyarihan ng krimen.

Ayon sa hepe ng Tagum Police Station na si Police Superentendent Laudemer Laude, isa sa mga posibleng motibo ay may kinalaman sa dating trabaho ng biktima.

Sinubukan ng ABS-CBN News na kuhanan ng pahayag ang pamilya ng biktima ngunit hindi pa ito nagpapaunlak sa imbitasyon.