5 nakaligtas sa Tanay bus crash, nagsampa ng kaso

MANILA - Inihabla ngayong Martes ang paaralan at 2 bus companies na sangkot sa aksidente sa Tanay nitong Pebrero.

Matatandaang 15 ang nasawi kabilang ang driver nang maaksidente ang bus sakay ang mga estudyante ng Bestlink College.

Limang survivor ng aksidente ang naghain ng reklamo sa Quezon City Trial Court laban sa Best Link College, Panda Coach Tours and Transport, Inc. at Haranah Tours Corporation.

Bestlink College, Panda Coach, at Haranah Tours, sinampahan na ng kaso sa Quezon City RTC kaugnay ng Tanay bus accident. | @jeffreyhernaez pic.twitter.com/mRrB4wPiP4

— DZMM TeleRadyo (@DZMMTeleRadyo) March 7, 2017

Nahaharap ang mga respondent sa breach of contract at cuasi delict o negligence resulting in death and/or injuries.

Hiningi ng mga complainant na magbayad ang mga akusado ng P1 milyon para sa moral damages at P1 milyon para sa actual at exemplary damages sa kada isang estudyante na nadamay sa aksidente.

Ayon kay Atty. Rolando Sibal ng Lawyers for Commuters Safety and Protection, naghain din sila ng mosyon sa korte para hindi na pagbayarin ng filing fee ang mga estudyante na aabot sa P200,000.

Ilan pa umanong survivor ng aksidente ang nakatakda ring magsampa hiwalay na reklamo.