TRENDING: Bata binigyan ng ‘DIY’ moving-up ceremony sa Pampanga sa gitna ng quarantine

Ngayong naantala ang ilang school events, gaya ng graduation at moving-up day, may sorpresang inihandog ang pamilyang Tuazon para sa kanilang 4 anyos na pamangkin sa Apalit, Pampanga

Excited talaga ang batang si Azrael Tuazon para sa kaniyang Day Care Moving Up Ceremony, ayon sa kaniyang tita na si Femy Jean Tuazon.

Pero naantala ito dahil suspendido ang ilang school events kasabay ng pagpataw ng enhanced community quarantine - bagay umano na ikinalungkot ng bata.

Para mapasaya ang bata, naisip nilang mag-anak na bigyan siya ng sariling moving up.

Kanya-kanya silang toka mula sa kung sino ang magpapatugtog ng musika hanggang sa sino ang maghahanap ng props sa paligid.

Ayon kay Femy Jean, labis ang naging kasiyahan ni Azrael lalo pa't kahit practice ay hindi nagawa ng bata sa paaralan.

Ipapakita dapat nila sa ina ni Azrael na nasa Taiwan ang video kaya in-upload sa social media, na kasalukuyang may 21,000 reactions at 14,000 shares.

Payo ni Femy Jean sa mga magulang na may nalulungkot na mga anak, kausapin lang ang mga ito at ipaliwanag ang kahalagahan ng kalusugan.