Hinuli ng mga pulis ang isang miyembro ng National Federation of Sugar Workers (NFSW) sa checkpoint sa Cadiz City, Negros Occidental Martes ng gabi.

Nakuhanan umano si Gaspar Davao, organizer ng nasabing farmers’ group, ng isang granada at subersibong dokumento sa loob ng isang pampasaherong van, ayon sa pulisya.

Ayon kay Police Col. Robert Mansueto, hepe ng Cadiz City police, sinita si Davao dahil wala umano itong suot na face mask nang matigil ang van sa isinagawang checkpoint sa Barangay Caduhaan.

Pumalag umano si Davao at napansin ng mga pulis na may dala umano itong granada na nakalagay sa sling bag. Nabawi rin ng mga pulis ang ilang dokumento mula kay Davao.

Kinondena naman ng farmers’ group ang pagdakip kay Davao.

Ayon kay NFSW secretary-general Butch Lozande, hindi kapani-paniwala ang mga paratang ng mga pulis sa kanilang hinuling kasamahan.

Nababahala rin sila sa umano’y ginagawang red-tagging ng mga pulis at militar.

Ani Lozande, nakasama pa nila si Davao sa isang meeting kasama ang grupong Bayan sa Bacolod City bago ito nahuli.

Nakadetine ngayon si Davao na nahaharap sa kasong paglabag sa city ordinance ukol sa pagsuot ng face mask, disobedience to a person in authority or the agents of such person, kasama na ang illegal possession of explosives.