Lalaking tumakas sa mga pulis, patay nang tumalon sa ilog sa Negros Occidental

KABANKALAN CITY - Natagpuang patay at palutang-lutang ang isang lalaking tumalon umano sa ilog upang makatakas sa mga pulis dito sa siyudad, Biyernes.

May nakitang mga sugat sa leeg, paa at mata ang 33-anyos na biktima na kinilalang si Hernan Arroz nang maiahon siya mula sa bahagi ng ilog sa Barangay Talubangi.

Ayon sa imbestigasyon ng mga pulis, naaresto si Arroz noong Huwebes dahil sa kasong illegal gambling ngunit tumalon ito sa ilog upang makatakas.

Maaring nakuha ni Arroz ang kaniyang mga sugat sa kaniyang pagtalon at pagpalutang-lutang sa ilog, sabi ng mga awtoridad.

Isinailalim na sa autopsy ang bangkay ni Arroz para malaman ang sanhi ng kaniyang pagkamatay.