Bata sa Sarangani kailangang operahan matapos masaksak ng gunting sa ulo

Maselan ang kondisyon ng isang 8 anyos na babae matapos maiwang nakatusok ang gunting sa kanyang ulo.

Ayon sa ama ng bata na si Rene Raga, aksidenteng naitusok ang gunting ng nakababatang kapatid na lalaki ni Nicole nitong Lunes, Hulyo 3.

Ito'y matapos umanong ipalo sa ulo ni Nicole ang bag na may laman palang gunting.

Nag-away ang magkapatid dahil umano sa lapis.

Lumuwas mula sa Malungon, Sarangani province ang pamilya noong Hulyo 4 at ipinasok sa ospital si Nicole para maoperahan.

Nakapagbayad na ang pamilya ng downpayment para sa nakatakdang operasyon ni Nicole.

Galing umano sa donasyon at ambag ng mga taong nahabag sa sitwasyon ni Nicole ang ipinambayad. - ulat ni Anne Santos