Watch more in iWantv or TFC.tv

Ikinatuwa ng mga pasahero ang muling pag-arangkada ng Philippine National Railways (PNR) mula Caloocan hanggang Dela Rosa, Makati dahil sa mabilis na biyahe at murang pasahe.

Ayon kay Thelma Rivera, dahil sa ibinalik na PNR line ay naiwasan niya ang mga problemang karaniwang nararanasan ng mga pasaherong papuntang Makati gaya ng masikip na trapiko sa EDSA, at mga aberya at mahabang pila sa MRT.

Mula sa dalawang oras ay 30 minuto na lang umano ang kaniyang biyahe.

"Before kasi bus ako eh, 'yong normal trip ko na two hours from here to Makati, it was cut short for 30 minutes so happy na ako dito," aniya.

"Unlike sa ibang commuter train, masikip. Minsan masisiraan pa," sabi naman ng pasaherong si Darwin Tumanday.

Sa pagsubok ng ABS-CBN News, inabot ng 37 minuto ang tagal ng biyahe mula Caloocan hanggang Makati.

• Biyaheng Caloocan-Makati ng PNR, muling umarangkada

Miyerkoles nang magsimulang bumiyahe muli ang linya matapos ang dalawang dekada.

Nasa P15 ang minimum fare sa pasahe, at may 20 porsiyentong diskuwento para sa mga senior citizen at persons with disability.

Tigdalawa sa umaga at hapon ang biyahe ng mga airconditioned na tren sa PNR Caloocan-Makati line.

Ayon kay Joseline Geronimo, officer-in-charge ng PNR, simula pa lang ang Caloocan-Makati line sa pagpapasigla ng PNR sa kanilang mga linya.

"Gusto na naming umpisahan ang pag-revive sa aming network. Fifty-four trips within a day. 'Pag dumating iyong bagong trains next year, we're hoping na mai-launch namin 'yong 100 trips target namin," ani Geronimo.

Pinag-aaralan na rin umano ng pamunuan ng PNR ang iba pang puwedeng ruta at pagdagdag sa mga biyaheng pa-Makati sa mga darating na linggo.

-- Ulat ni Angel Movido, ABS-CBN News