Lumalagablab na sunog sa residential area sa Quezon City

Aabot sa tatlong daang pamilya ang nawalan ng tirahan sa sunog na sumiklab sa isang residential area sa Brgy. San Roque sa Quezon city.

Ayon kay Fire Chief Inspector Marvin Mari, Chief of Operations ng BFP Quezon City, nagsimula ang sunog dakong alas singko ng madaling araw sa likurang bahagi ng residential area. Inakyat sa ikalawang alarma ang sunog bago naapula ng alas syete kwarenta ng umaga.

Tatlong indibidwal ang nagtamo ng minor injuries at first degree burns habang walang nasawi sa sunog.

Ayon kay Brgy. Chairman Nonoy Mortega ng Brgy San Roque, nasa 100 bahay ang nasunog.

Magkakadikit at pawang gawa sa light materials ang mga ito.

Pansamantala muna manunuluyan sa tatlong evacuation centers sa lugar ang mga nasunugan.

Patuloy na iniimbestigahan ang pinagmulan ng sunog at kabuuang halaga ng pinsala nito.