Driver na dumaan sa EDSA busway nagpanggap na buntis, nanuhol ng enforcers: DOTr

MAYNILA — Arestado nitong Lunes ang isang babae matapos ang umano'y patong-patong na paglabag sa batas trapiko, tulad ng pagdaan sa EDSA busway, pagpapanggap na buntis, at tangkang panunuhol sa enforcers.

Ayon sa DOTr, nahuli ang babae nitong umaga sa may Santolan Station pero imbes na makipagtulungan ay nagpanggap daw itong 2-buwang buntis na nasa gitna ng medical emergency. 

Sinubukan din umano ng suspek na suhulan ng P500 ang nanghuling enforcer. 

"The driver, whose identity is currently being withheld, was apprehended for violations including bribery, influence peddling, refusal to surrender her driver’s license, refusal to surrender her vehicle registration, and illegal use of the EDSA busway, a dedicated lane for public transportation," ayon sa DOTr.

Nagpakita din daw ang suspek ng isang calling card ng PNP director upang impluwensyahan ang mga nanghuli sa kanya. 

Nag-issue na ng show cause order ang LTO sa driver para sa hearing na itinikda sa mga susunod na araw.