PNP: Walang Medal of Valor para sa SAF 44

Nilinaw ng Philippine National Police (PNP) na wala silang ibinibigay na Medal of Valor sa SAF 44.

Ito ay kasunod ng pagkontra ni Defense Secretary Delfin Lorenzana at Medal of Valor awardee Ariel Querubin sa plano ng pamahalan na bigyan ng Medal of Valor ang lahat ng miyembro ng SAF 44.

Ang usapin ay nagsimula nang ipinangako ni Pangulong Rodrigo Duterte sa mga naulila ng mga SAF44 ang pagbibigay ng Medal of Valor para sa mga nasabing kawani.

Ang Medalya ng Kagitingan ang pinakamataas na parangal na iginagawad nila sa mga natatanging pulis, at ang militar lang aniya ang maaring makatanggap ng Medal of Valor, paliwanag ni Dionardo Carlos, ang tagapagsalita ng PNP.

Ayon kay Carlos, hindi rin pareho ang nakukuhang benepisyo ng dalawang medalya.

Nakakatanggap ng P75,000 na buwanang pensyon ang mga Medal of Valor awardees ng militar, habang P20,000 lang ang nakalaan para sa mga Medalya ng Kagitangan awardees ng PNP.

Dagdag ni Carlos, Medalya ng Kagitingan at hindi Medal of Valor ang natanggap ng 2 miyembro ng SAF 44 na ginawaran noong panahon ni dating Pangulong Benigno Aquino III.