Buko vendor, inireklamo ang nanakit na MMDA enforcers

MAYNILA - Inireklamo ng isang buko vendor ang 3 traffic enforcers na nanakit sa kanya sa clearing operations ng Metropolitan Manila Development Authority (MMDA).

Naghain ng reklamong physical injuries at threat sa piskalya ng Pasig ang buko vendor na si Romnick Relos laban sa enforcers na sina Victor Jimenez, Jonathan Bregente at Leonard Mojica.

Nakunan sa video ang insidente at nag-viral pa sa social media nitong unang linggo ng Marso.

• SAPUL SA VIDEO: Buko vendor, bugbog-sarado nang pagtulungan ng MMDA
• Coconut vendor in viral mauling video arrested for murder

Iginiit ng tindero na nakiusap siyang huwag na itaob ang kaniyang kariton at kusa na lamang siyang aalis. Pero ayon sa mga enforcer, pinagmumura at binato umano sila kaya gumanti sila sa buko vendor.

Nasa kustodiya ngayon ng Criminal Investigation and Detection Group - Detective Special Operations Unit si Relos na inaresto noong nakaraang linggo dahil sa kaso umano ng pagpatay noong 2008.

Matapos ang pagsasampa ng reklamo, ihaharap naman ng CIDG sa korte sa Masbate si Relos para sa kinakaharap na kaso.--ulat mula kay Maan Macapagal, ABS-CBN News